ព្រះសីហនុ៖ រដ្ឋលេខាធិការក្រសួងមហាផ្ទៃ និងជាប្រធានក្រុមការងារបង្ក្រាបបទល្មើសល្បែងស៊ីសងគ្រប់ប្រភេទនៅទូទាំងប្រទេសលោក សុខ ផល បានប៉ាន់ប្រមាណថាកម្លាំងពលកម្មក្នុងល្បែងស៊ីសងខុសច្បាប់នៅកម្ពុជាអាចមានរហូតដល់១០ម៉ឺននាក់ ដែលជាចំនួនមួយដ៏ច្រើននិងត្រូវការអប់រំ។ លោកជំរុញឱ្យមានការផ្សព្វផ្សាយឱ្យបានច្រើនដើម្បីឱ្យអ្នកប្រព្រឹត្តិអំពើខុសច្បាប់ទាំងនោះរំសាយចោលនូវការរកស៊ីបែបនេះ។
ថ្លែងប្រាប់ក្រុមអ្នកសារព័ត៌មានក្នុងពេលចុះបង្ក្រាបទីតាំងល្បែងស៊ីសងខុសច្បាប់ ក្នុងក្រុងព្រះសីហនុ ខេត្តព្រះសីហនុ នៅថ្ងៃទី២៣ ខែកញ្ញានេះ លោករដ្ឋលេខាធិការ សុខ ផល បានឱ្យដឹងថាក្រោយពីប្រមុខរាជរដ្ឋាភិបាលមានចំណាត់កាល នៅពេលនេះឃើញមានការបង្ក្រាបច្រើនករណីល្បែងស៊ីសងខុសច្បាប់នៅទូទាំងប្រទេសកម្ពុជា ទោះជាយ៉ាងណាក៏នៅមានមួយចំនួននៅបន្តនិងមិនទាន់បង្ក្រាបបានផងដែរដោយលោកចង់ឱ្យមានការផ្សព្វផ្សាយឱ្យបានច្រើនដើម្បីឱ្យបញ្ហាទាំងនេះត្រូវបានដោះស្រាយឱ្យកាន់តែឆាប់។
លោក សុខ ផល ថា៖ «សូមជួយផ្សាយឱ្យបានទូទាំងប្រទេស ព្រោះថាមិនមែនតែនៅកំពង់សោមមួយទេនៅទូទាំងប្រទេស ២៥ខេត្ត-រាជធានី មានទាំងអស់ហ្នឹងល្បែងស៊ីសងខុសច្បាប់ ជាពិសេសល្បែងស៊ីសងខុសច្បាប់កម្រិតទី២ មានអាប៉ោង បៀអីនៅមូលដ្ឋាននេះកម្រិតបើសិនគាត់ឈប់ទៅស្រួលដែរ។ បើយើងប៉ានស្មានទៅឃើញថាមនុស្សប្រមាណ ១០ម៉ឺននាក់មកបម្រើការងារហ្នឹងអញ្ចឹងបើថាយកទៅទុកយកទៅដាក់ (ពន្ធនាគារ) រកកន្លែងមិនបានទេ»។
ការបង្ក្រាបល្បែងស៊ីសងខុសច្បាប់ពីសំណាក់រាជរដ្ឋាភិបាលចាប់ផ្ដើមមានខ្លាំងក្លាបន្ទាប់ពី នាយករដ្ឋមន្ត្រី សម្ដេចតេជោ ហ៊ុន សែន បានចេញសារសំឡេងបញ្ជាដោយផ្ទាល់មាត់កាលពីថ្ងៃទី១៧ ខែកញ្ញា។
តាមរយៈសារសម្លេងពិសេសនោះ សម្ដេចតេជោ ហ៊ុន សែន ព្រមានដកតំណែងមន្ត្រីចាប់ពីថ្នាក់អភិបាល ស្រុក ខណ្ឌ រហូតទៅដល់ខេត្ត-រាជធានី រួមទាំងមន្ត្រីនគរបាល និងអាវុធហត្ថចេញពីតំណែង ប្រសិនជាពួកគេមិនអាចបង្ក្រាបល្បែងស៊ីសងខុសច្បាប់នៅក្នុងទឹកដីភូមិសាស្ត្ររបស់ពួកគេបាន។
ក្នុងនោះ សម្ដេចឱ្យដឹងបន្ថែមថា រាជរដ្ឋាភិបាលបានសម្រេចបង្កើតក្រុមការងារថ្នាក់ជាតិមួយ សម្រាប់ការចុះបង្ក្រាបទីតាំងល្បែងស៊ីសងខុសច្បាប់។
មួយវិញទៀត សម្ដេចថា ការបង្កើតក្រុមការងារថ្នាក់ជាតិនេះថ្នាក់អភិបាលស្រុក និងអភិបាលខេត្តក៏ត្រូវមានការងារក្នុងការចុះបង្ក្រាបដោយផ្ទាល់របស់ខ្លួនផងដែរ ខណៈក្រុមការងារថ្នាក់ជាតិក៏មានភារកិច្ចមួយទៀតនឹងស៊ើបអង្កេតលើមន្ត្រីពាក់ព័ន្ធណាដែលរួមចំណែកឃុបឃិតក្នុងការបង្កើតឱ្យមានល្បែងស៊ីសងខុសច្បាប់នៅក្នុងភូមិសាស្ត្រស្រុក-ខេត្តទាំងនោះ៕
